احنا دلوقتي دول في عصر السرعة ، و طبعا الانترنت مليان لينكات لمواقع كتير بتوصل لمحتوى اكتر .
ازاي بقى نخلي عناوين اللينكات الخاصة بينا جوة الموقع تظهر للناس وناخد التفاعل بتاعتها ونشجع اي مستخدم انه يكمل في الموقع بتاعنا ؟ دة بيعتمد على اختيار العنوان الخاص باللينك.
الناس عرّفوا قاعدة ال4S وهي قاعدة ظريفة جدا بتختصر ايه الاساسيات في أي لينك انت بتختار عنوانه عشان يشد انتباه المستخدم ويحقق أكبر مكسب ليك. قاعدة ال4Sهي عبارة عن :
Specific :
لازم دايما عنوان اللينك يقول انت مودي المستخدم فين ، عمرك شوفت مكتب محامي من غير يافطة بتقول انه مكتب محامي ؟ الناس هتعرف منين ان المكتب دا للمحامي ؟
نفس الكلام انت بتكتب في اللينك المفروض المستخدم اما يدخل يلاقي ايه بالظبط من غير لف ولا دوران.
Sincere :
زي ما اتقال بالظبط اللينك زي وعد كدا لازم توفيه متلفش وتدور عالمستخدم وتقوله اللينك الجاي فيه لينك الدوانلود بجد لا اللينك اللي بعده هو اللي هتنزل منه المرة دي عشان الموضوع دا بيزعل المستخدم جامد بل بيخليه ميقربش من السايت بتاعك تاني و بيفقد الثقة تماما فى الموقع بتاعك.
Substantial :
حاجة مهمة جدا ان العنوان يكون جوهري يعني انه اما يتقرأ كدا يكون في صميم الموضوع وانت فاهم ايه دا من غير أي توضيح زيادة ويكون المعنى واضح وصريح عشان اللينك يبقى واخد أولوية عن الكلام اللي حواليه .
Succinct :
طبعا دا كان جاي آخر الليست عشان لازم نراعي ال3 قواعد اللي قبله
لكن التلخيص في العنوان مهم جدا ، متكتبش موضوع تعبير في العنوان وتقولي محدش هيقولي انت مطول ليه وتقول ماهو لازم يبقى صادق وفي الصميم و مخصص يبقى هطول فيه
اكتب المختصر المفيد اللي يوفي ال3 شروط اللي فاتوا .
