ليه في ناس بتخاف تركب طيارات بس في نفس الوقت بتركب عربيات عادي ؟
مع ان حسب الاحصائيات خطر انك تموت في حادثة عربية اكبر من انك تموت بطيارة واقعة ؟
لأن دايما حوادث الطيارات بتاخد ضجة كبيرة وبتظهر في الاخبار وكل الناس بتتكلم عنها اما تحصل وعشان كدا بتيجي في بالنا اسرع من حوادث السيارات رغم ندرتها .
فيه بحث اتعمل عن طريقة تفكير دماغنا لما بتتعامل مع القرارات واكتشفوا حبة سلوكيات وطرق كدا الدماغ بيعملها اما بيتحط قدام موقف هو اول مرة يعرفه او حاجة مش متأكد منها.
الحاجات دي اسمها Brain Heuristics وهي طرق مختصرة دماغنا بياخدها عشان يوفر على نفسه في التفكير وياخد قرارات هو بيشوفها الانسب. رغم ان الاختصارات دي مفيدة جدا وبتسهل الدنيا الا إن مش دايما بتاخد قرارات منطقية او القرار الأصح في الموقف اللي احنا اتحطينا فيه .
لما نيجي نتكلم عن الavailability هنقول انها بردو اختصار من اختصارات الدماغ وهي انك دايما بتدي أهمية للحاجة اللي طلعت في سطح ذكرياتك الاول، مهما كانت الحاجة دي تاخد الأهمية أو لا بس الدماغ دايما بيفضل أول شيء ييجي عالبال على طول. احنا بنستخدم الHeuristics في حياتنا دايما وبصورة دائمة في مختلف المواقف.
عشان كدا احنا الديزاينرز لازم ناخد بالنا من الاختصارات وطرق التفكير دي عشان نتفادى الاخطاء لما تحصل ونعرف اسبابها.
انت مثلا لما بتيجي تحط حبة features قدامك وعايز تحدد الأولويات في التصميم وايه اللي ياخد اهتمامك الاول لازم تاخد بالك ان مش اول حاجة تيجي في بالك هي أهم حاجة لإن ممكن تكون هي جت في بالك عشان زميل ليك قالك شوف كذا او اشتغل هناك او يوزر مثلا قال في الفيد باك انه عايزها تكون موجودة ، بل لازم تاخد خطوة لورا وتقعد تلف في دماغك كدا عشان تعرف تحدد أولوياتك صح وايه وجهتك اللي جاية وتعمل research عليها كويس جدا.
ازاي نستفيد من الavailability heuristic على الناحية بتاعت المستخدم ؟
فيه براندات كتير مش بيهتموا بجودة الاعلانات قد ما بيهتموا انهم يعرضوا ليك كمية كبيرة من البراند بتاعهم عشان يبقى أول حاجة تيجي في بالك اما تبقى عايز تشتري ودى غالبا بتنجح بشكل كبير، الموضوع دا مهم جدا في الدعاية والاعلانات واي براند عايز يسوق نفسه كويس بياخد الاتجاه دا او انه بيعمل اعلان باغنية مثلا تفضل معلقة في دماغك طول الوقت.
في نقطة تانية وهي انك لازم دايما دايما تاخد بالك من التجربة الاولى لليوزر والنهاية اللي اليوزر بيعيشها لما بيستخدم التطبيق بتاعك ، بيسيب انطباع عامل ازاي في دماغه وايه الذكرى اللي بتبقى على سطح ذكرياته لما بيفتكره ، لان دايما أول حاجة بتيجي في دماغنا هي أكتر حاجة أثرت فينا.
لازم تخلي اليوزر يفتكر الابلكيشن بتاعك وانطباعه يكون كويس عشان لما نيجي نعرف رأي اليوزر في ان ايه احسن ابلكيشن استخدمه يكون الابلكيشن بتاعك دايما اول حاجة بتيجى على باله .
References: https://www.nngroup.com/videos/availability-heuristic/
