فريق الديزاينرز

في بداية أي مشروع ولما بنبتدي نجمع تيم جديد لازم ناخد بالنا جدا من تنظيم التيم دا كأشخاص ونحدد قدراتهم. بالذات اما التيم دا يكون ناس جديدة ولسه مشتغلوش مع بعض قبل كدا ، المشروع لسه في بدايته وعايزن نحدد أي مهام هتروح لأي شخص أو شخص جديد داخل عالتيم ولازم نظبط الشغل بين افراد التيم.

وزي مافي لاعيبة كورة كتير بس انت اما بتجمع فريق كورة مش بتروح تدور على لعيبة كورة بل بتدور على ادوار جوا الفريق زي المدافع والمهاجم وخط الوسط ، لفظ لعيب كورة هنا عام ومش بيوضح الدور الاساسي اللي اللاعب بيبرع ويبدع فيه.

نفس الكلام بالنسبة لمصمم الUX ، الاختصاصات جوا الUX متنوعة وكتير وكل شخص بيبقى ليه الشيء اللي بيتميز فيه مهما كان اسم الوظيفة بتاعته عام وشامل، في اللي بيشتغل في الusability testing والتاني شغال في الvisual design.

والمهم في تأسيس أي فريق عمل انه تبقى عارف امكانيات كل فرد ومميزاته و تقيّم شغله كفرد، وبعد كدا بتبتدي تنظم الشغل والخطة العامة للمشروع وازاي التاسكات هتتوزع.

عشان كدا في أي اجتماع ابتدائي لازم تعرف 3 حاجات من كل فرد :

  • أولا : ايه مميزات الفرد ومواطن قوته في الشغل وايه أفضل حاجة ممكن يساهم بيها في المشروع، ازاي الشخص دا ممكن تتواصل معاه ، هل هو بيفتح الميل بتاعه على طول ؟ هل بيفضل اجتماعات شخصية ؟
  • ثانيا : ايه الحاجات اللي يقدر يساهم بيها برا مجال تخصصه ؟ هل هو متميز في شيء كمان ؟ يقدر يعوض نقص في اختصاص تاني وازاي يقدر يساهم في تخصص تاني ويساعد فيه دايما كويس لما بيكون عندك لاعيب جوكر في الملعب بيملى الفراغات ونفس الكلام للاشخاص الmulti-role
  • ثالثا : ايه المهمات اللي الشخص مش كويس اوي فيها ؟ ايه الحاجات اللي مش بيحب يشتغلها ؟ باختصار ايه نقط الضعف عند الشخص دا وازاي هنعوضها والفراغات اللي هنقدر نملاها.

الاجتماعات دي مهمة عشان لازم كله يفهم امكانيات الفريق اللي شغال معاه ، لازم الكل يفهم الخطة هتمشي ازاي و المشروع هيتعمل ازاي ، مين هياخد أي أدوار ومين هينفذ ايه .

دايما دايما التيم اللي فاهم بعضه حتى لو مستوى الافراد متوسط في المجمل لكن التيم كله فاهم بعضه ومكمل بعضه وسادد كل الفراغات بيبقى احسن مليون مرة من تيم كله سوبر ستارز بس محدش محدد أدوار معينة او مش فاهمين بعض.

Leave a Reply

Your email address will not be published.