عناصر هتنقل الديزاين بتاعتك للمستوى العالمى 

عناصر هتنقل ال UX بتاعتك للمستوى العالمى 

فيه أجزاء كتير فى التطبيقات قليل لما بتتجرب أو حد بيوصلها بس انت كمصمم لازم تراعى وجود وغياب الأجزاء دى وتكون واخد بالك كويس من كل تفاصيل تجربة المستخدم بشكل عام ، لإن انت بصفتك UX designer مطلوب انك تقدم أفضل تجربة ممكنة للمستخدم ويكون عندك رؤية شاملة ليها أبعد بكتير من مجرد التصميمات المرئية والحاجات الظاهرية دى.

1- Onboarding

دى أول حاجة المستخدم بيجربها ودى بتكون عبارة عن إنك بتدى كل التعليمات والتفاصيل الخاصة بكل button وازاى تستخدمه وارشادات لكل ضغطة بتتضغط بس مفيش حد بيفتكر كل الارشادات دى لأنهم بيكونوا عاوزين يفتحوا التطبيق بسرعة ويخوضوا التجربة.

كمان انت لازم تصمم تجربة سهلة لان لو كان التصميم معقد لدرجة ان المستخدم عاوز شرح تفصيلى ليه خطوة بخطوة فانت محتاج تعيد نظر فى اللى انت عملته.

المفروض دايماً تتيح للمستخدم خوض التجربة بدون أى خوف أو قلق انه ممكن يتوه فى أى لحظة أو يبقى مش عارف هو المفروض يعمل إيه!

• متقاطعش المستخدم كل شوية علشان عاوز شوية بيانات عنه وهو أساسا مش بيكون متحمس إنه يديهالك ، فلو كنت هتسأل على معلومات اتأكد الأول ان المستخدم حاسس بل ومتأكد إنه هياخد شئ بالمقابل.

2- Form Fields

صياغة أو إنشاء الfields فى الغالب بيكون أصعب حاجة سواء من ناحية التصميم أو من ناحية الكود.

من ناحية التصميم لازم النماذج تكون مباشرة ومفهومة ومن ناحية الكود بتكون مختلفة إلى حد كبير عن كل عناصر ال HTML من حيث التخصيص.

يعتبر تصميم النماذج دى أهم جزء فى الويب سايت او الأبليكيشن لأنهم بياخدو فيه معلومات من المستخدمين .

• حاول وانت بتصمم النماذج دى تستخدم الملء التلقائى خاصة لو على الموبايل علشان يسرع العملية ويقلل الكتابة على الكيبورد الصغيرة.
• ادى المستخدمين ملاحظات فورية عن المعلومات اللى قدموها سواء صح او غلط ولو كانت غلط يعملوا ايه وهكذا.
• كمان لازم المستخدم يحس بالأمان وهو بيشتغل خاصة لو بيطلب منه معلومات شخصية او حساسة .

3- Copy

كتير من المصممين بيرددوا الجملة دى ” أنا بشتغل UX ديزاينر بس مش شغلى انى اكون مؤلف او محرر”

أكيد انت صح بس في نقطة لازم تاخد بالك منها وهى ان النسخ اللى المستخدمين بيقرأوها وبيتفاعلوا معاها دى جزء من التجربة الى انت بتصممها ، يعنى بمعنى أصح :

• خليك كرييتف فى طريقة كتابتك بس فى نفس الوقت يكون ليها معنى يتفهم.
• اعرف الفئة الى بتخاطبها ، يعنى مثلا الأطفال او المراهقين ممكن ميكونش عندهم مشكلة مع الbuttons الى فيها fun ومتعة وحركات من دى ، أما الفئة الكبيرة او الى بيكون صعب عليها التعامل مع التكنولوجيا بيبقى عاوز يعرف بس إيه الى هيحصل لما يضغط هنا ولا هنا.

لازم تختبر طريقة الكتابة بتاعتك سواء اونلاين او مع users فى الحياة الواقعية.