التفكير التصميمي

التفكير التصميمي

هو عبارة عن طريقة تفكير منظمة بنركز من خلالها على العميل اللي بيستخدم الخدمة الخاصة بينا، والطريقة دي بتنقسم ل ٦ خطوات بسيطة من خلالها نقدر نركز على المشاكل اللي هتقابل العميل بتاعنا ونقدر نوفرله أفضل تصميم يحل المشكلة الحقيقية بتاعته.

ايه أهمية التفكير التصميمي ؟ 

الحقيقة النوع دا من التخطيط والتفكير بيسهل جدا التعاون بين فريق العمل والأهم من دا انه بيخلي دايماً العميل هو المحور الأساسي للتصميم بتاعك و بالتالى بنفهم اكتر عن المشكلة وبالتالى بنلاقى انسب حل ليها. 

الخطوات الستة للتفكير التصميمي:

١. الدراسة والبحث :

أول خطوة دايما هي انك بتبدأ تجمع أكبر قدر من المعلومات المفيدة واللي هتساعدك في التصميم سواء كانت مقابلات مع العملاء، دراسات على المستخدمين، ملاحظات وتحقيقات وحاجات غيرها كتير تقدر من خلالها توصل لأهم احتياجات العميل اللي المفروض تلبيها.

٢. تعريف المشكلة : 

التفكير التصميمي بيقول انك الأفضل تحدد المشكلة والمطلب الأساسي الاول قبل ما تفكر في أي حلول.

المفروض في الخطوة دي تعرف العميل محتاج ايه بالضبط وتعرف المهام اللي هتكلف بيها فريق العمل والاهداف اللي المفروض يحققها.

٣. صياغة الأفكار: 

بعد ما حددنا المشكلة هنبدأ نجمع أكبر قدر من الأفكار والمقترحات ونشوف الحلول المتاحة ونتناقش فيها لحد ما نوصل لأفضل اختيار يركز على مصلحة العميل.

٤. التصميم المبدئي : 

بنعمل نموذج مبدئي -Prototype- ودا عبارة عن تصميم بنعرف بيه الشكل النهائي للمنتج اللي هيوصل للعميل ونطبق فيه الأفكار والاستراتيجية اللي طلعنا بيها.

٥. الاختبار::

نختبر النموذج اللي صممناه ونشوف هل المستخدم مبسوط بيه ؟

هنكرر الاختبارات ونسأل العميل لغاية ما نقدر نوصل لمرحلة إن المنتج النهائي واصل في أفضل شكل، والعميل قادر فعلا يفهم إزاي يستخدم التصميم بتاعنا وقادر يتعامل مع المحتوى اللي بنقدمه.

٦. التصميم النهائي : 

بنستفيد بكل المعلومات والاختبارات والفيدباك من العملاء ونبتدي على أساسها نحدد الشكل النهائي للمنتج.

Reference: https://www.nngroup.com/videos/design-thinking/

Leave a Reply

Your email address will not be published.