ازاي ترسم الكلمات؟

البني آدم بيحب يرتاح

دا طبيعة الانسان انه مبيحبش يتعب ، احنا كبشر لما بنيجي نقرأ عيوننا بتكسل بسرعة ، ودا مش عيب في شخص واحد بعينه بل دا طبيعتنا كبشر.

اللغة من اول ما الانسان عرفها لحد دلوقتي اساسها التواصل وايضاح المعاني ، بس للاسف البشر مش بيقرأوا بالدرجة اللي أي كاتب يقدر يتخيلها.

كسلنا في القراءة مش شرط يكون شيء سيئ بل بالعكس كمصمم كسل القراءة دا هيخليك تعرف ايه الكلام اللي يتكتب وايه اللي هيخلي الناس تمل.

هنتناقش ازاي نخليها كتابتنا سهلة وبسيطة متوجعش عينين اللي بيقرأ وازاي انت تخليك كتابتك مظبوطة في التصميم بتاعك.

—-

“أنا أخدت وقت في تسمية الbutton دا أكتر من الوقت اللي فكرت فيه في اسم لابني. “

لازم كمصمم تاخد بالك من انتقاء الكلمات وطريقة الكتابة وعشان كدا هنكتبلك


7
نصايح تساعدك تكتب في التصميم :

1 – لخّص المحتوى

اللي تعرف تكتبه في 3 كلمات متكتبوش في 10 .

الرسالة كل ما كانت موجزة وواضحة كل ما كانت احسن.

استخدم كلمات بسيطة ومفهومة.

المستخدم لو عايز يعرف اكتر عن أي حاجة فيها تفاصيل كتير ممكن تلجأ لاستخدام “learn more about X “.

2 – اكتب عناوين

عنوان بيشرح المجمل اللي تحته هيكون أفضل ، بتوفر وقت على المستخدم بتاعك وبتفهمه النقطة

أسرع.

استخدم الكلمات الاساسية اللي المستخدم بيدور عليها .

3 – رتب الكلام في قوائم 

الكلام المترتب ومعمول نقط و مترقم بيبقى أسهل في القراءة واريح للعين من الكلام اللي بيبقى زي بلوك كبير ورتيب كدا .

لما بتكتب حاجة فيها عناصر معطوفة على بعض كتير او حاجة فيها تنوعات ، حاول تكتبها في قائمة.

4 – ريح العين ورتب الدنيا

حاول تحط فواصل افقية بين كل جزء من الكلام والتاني ، حاول تفصل الافكار عن بعض وتفصص الكلام الطويل. 

تروق الكلام بصور توضيحية كدا وتريح عين اللي بيقرأ بين كل فكرة والتانية.

5 – حدد المهم من الكلام

لازم تشوف ايه المهم في الكلمات اللي بتكتبها وتظهره اكتر من الكلام الاقل اهمية 

طريقة تقديم الكلمات مهمة بالظبط زي الكلمات اللي بتستخدمها. 

الhighlighting بلون واضح او انك تكتب المهم بخط Bold بيساعد، بتكتب الكلام الفرعي بخط اصغر وopacity أقل.

كل دا بيساعد في توضيح المهم للمستخدم وايه اللي يشد انتباهه ويفهمه المطلوب أويوصله للغرض اللي هو عايزه.

6 – التدريج

لما بتعلم المستخدم حاجة في البرنامج مينفعش تفاجئه بكل حاجة في وشه وتتوقع انه يفهم ! 

لازم بالتدريج و واحدة واحدة .

الانسان كسلان لو شاف حاجة اكتر من سطرين تركيزه بيروح، تخيل لما تحط قدامه رسايل كل رسالة سطرين بس كلهم على بعض 10 سطور؟ مش هيستوعب كل حاجة في ساعتها.

لازم واحدة بواحدة عشان المستخدم ميتوهش منك.

حاول متكترش في رسايل الtutorials بردو عشان اليوزر ميتضايقش وهو لسه في البداية.

الوسطية في الموضوع دا كويسة وجميلة .

7 – اكتب على التصميم على طول

الكتابة على التصميم مهمة مش تكتبها في حتة برة او مسودة .

الكتابة على التصميم هتوضحلك ازاي الكلام ظاهر وهل ماشي مع التصميم ؟ شكله كويس كدا ولا لا؟

هل الكلام موضح الوظيفة دي ؟

ممكن وانت بتكتب الكلمات الخاصة بيك ، الكتابة توضحلك حل احسن في التصميم .

لو الخاصية او الميزة مثلا محتاجة كلام كتير عشان تشرحها ، ممكن الخاصية نفسها محتاجة تتظبط عشان المستخدم يقدر يتعامل معاها .

5,765 Comments

Leave a Reply

Your email address will not be published.