ازاي تجهز نفسك للانترفيو كديزاينر ؟

ازاي تجهز نفسك للUX انترفيو ؟

  •  اقرأ كتير في ال UX ، دور عالمعلومات في جوجل ، مدونات او لينكد ان ، اعرف ايه الجديد وحصل معلومات على قد ما تقدر، المذاكرة بتفرق جامد في طريقة كلامك و بتبين قد ايه انت شاطر.
  •  جهز 25 سؤال يكونوا هما الاسئلة اللي انت متوقع تتسألها في الانترفيو، قبل الانترفيو هيكون عندك وقت تظبط كلامك وتفكر كويس ، هتقدر تخلي الكلام طالع منك بكل ثقة ، حتى لو اتسألت في حاجة انت مش متوقعها هيكون عندك وقت تقدر تفكر في اجابته.

الأخطاء الشائعة اللي بتحصل في الانترفيو

  • الكلام باستفاضة ، بتتكلم كتير بتفاصيل مش لازم تذكرها او الكلام في الفاضي من الاخطاء الشائعة ، بس كمان قلة الكلام والصمت الزائد عن الحد مش هيكون في صالحك حاول توزن الكلام وتعرف هتقول ايه ومتقولش ايه ، لان الكلمة هتتحسب عليك.
  •  انعدام الثقة في النفس من اكتر الأخطاء الشائعة دا غير تفادي الاتصال البصري -تبص في عين المحاور- هيقل من تقييمك جدا، التوتر موجود بس متخليش التوتر يسيطر عليك ويبوظ شخصيتك .
  •  اهم حاجة انك تجهز نفسك كويس اجهز للاسئلة ،اجهز للمقابلة نفسيا ، البس كويس وظبط شكلك عشان دا بيفرق في الانطباع .
  • متبدأش الانترفيو بالكلام عن المرتب مافيش حاجة كويسة هتيجي من الاستعجال، انزل بتقلك الاول ، اعرض مميزاتك وقيمتك الفعلية وعرف المحاور ايه التأثير اللي هتعمله في بيئة العمل بتاعته وبعد كدا اتفاوض.

ايه اللي المحاور بيدور عليه في الانترفيو ؟

  • بيدور على مهاراتك الشخصية ، مهارات زي الابداع في العمل ، التواصل الفعال مع الناس والدبلوماسية. مهارات زي التفكير الهندسي ، او فهم البيزنس ماشي ازاي . مهارات زي دراسة علم النفس -Psychology- وازاي تستخدمه في التصميم، الVisual design ومعاهم كمان الstory telling . كل دول مهارات هتزيد من قيمتك كمصمم و هي مهارات مطلوبة جدا في سوق التصميم.
  • الشخصية ، المحاور دايما عايز يعرف ايه الشخصية اللي هيعينها في بيئة العمل الخاصة بيه، طريقة نظرك للناس وتعاملك معاهم، بغض النظر عن مهاراتك الفذة شخصيتك وجانبك الانساني بنفس الاهمية بردو. هيسألك اسئلة زي انت شايف نفسك فين كمان 5 سنين ؟ او هتعمل ايه لو معاك فلوس كتير ؟ كنت بتعمل ايه قبل ما بدأت تصميم ؟ هيكون عايز يعرف شخصيتك وطموحك وطريقة تفكيرك ونظرك للدنيا من خلالهم .

مين بيعين حديثي التخرج أو المبتدئين وليه ؟

  • مش كل الشركات هتعين حد مبتدئ بس أكيد في شركات بتاخد المبتدئين دول لأن هما بيعتبروا دا استثمار ، لما بيعينوا المبتدئين مافيش خبرة سابقة أو بورتفوليو مليان شغل هيقولهم عليه لكن هيدوروا في الكورسات اللي خدتها ، التطبيق العملي اللي انت عملته لما اتعلمت .
  • نقطة كمان المحاور هيحاول يشوف قد ايه المصمم اللي لسه جاي دا جدير بالثقة ، هيشوف الشخصية بتاعته ويشوف هل هو مجتهد ولا لا، قد ايه قابليته للتعلم ومرونته في التعامل ، دا غير ال soft skills ،الشخصية هنا هتفرق كتير. ساعات هيكون مربح أكتر لما تاخد مبتدئ شاطر جدا ومجتهد وتدربه وتكبره بدل ما تجيب واحد خبير جاهز بس هياخد فلوس بزيادة. كونك لسه بادئ مش معناه بالضرورة أن موقفك مش حلو في السوق.

أهمية البورتفوليو

  • البورتفوليو واحد من أهم الحاجات اللي أي مصمم UX لازم يهتم بيها ، دي واجهتك قدام أي مدير انت رايح تقدم وتشتغل معاه. وهو أهم جزء من الاجزاء اللي في عملية التعيين تقدر تتحكم بيها وتحسنها وتخلي شكلها كويس.
  • اللي هيعينك عايز يعرف الدماغ اللي داخلة عنده دي شغالة ازاي ، بتفكر ازاي ؟ بتحلل المشروع ازاي وبتدور على حلول لمشاكله ازاي ؟ لازم تظهر قوة شخصيتك وشغلك وازاي دا بيأثر على اتجاه المشروع والاستفادة اللي بيحققها.

ازاي اختار المكان او الوظيفة المناسبة ليا ؟

  • لو قدامك كذا اختيار ومكان بتبتدي تدور على عوامل معينة زي المرتب ، المكان ، الناس اللي هتشتغل معاها ثقافة الناس اللي هتتعامل معاها في البيئة العمل ، المشاريع اللي هتشتغل عليها وايه اللي هيقدر يخليك تشتغل ب100% من قدراتك ويطلع ابداعك، المكان اللي هيقدر ينميك ويطورك وتتعلم فيه خبرات جديدة.

Leave a Reply

Your email address will not be published.